Hazard pasi e frymëzoi Chelsean drejt lavdisë në Ligën e Evropës: Lamtumirë, koha për sfidë të re
Eden Hazard me dy gola e frymëzoi Chelsean drejt triumfit në finale të Ligës së Evropës kundër Arsenalit, në atë që sipas të gjitha gjasave ishte ndeshja e tij e fundit për gjigantin nga Premierliga.
Pas ndeshjes, sulmuesi belg tha se ka kohë që e ka marrë vendimin për të ardhmen dhe se është duke pritur dy klubet të gjejnë marrëveshje.
“Ende nuk e di (për të ardhmen), mendoj se do të vendoset në ditët në vazhdim. Synimi im ishte ta fitoj këtë trofe, kjo është e gjitha. Siç kam thënë javë më parë, unë e kam marrë vendimin”, tha Hazard për BT Sport.
Hazard theksoi se tani synon sfidë të re në karrierën e tij dhe topin ua hodhi klubit aktual, Chelseat, dhe atij të ardhshëm, Real Madridit.
“Tani e gjitha varet nga klubet. Unë po i pres klubet, siç janë duke i pritur tifozët. Do ta merrni vesh pas pak ditësh. Mendoj se kjo është lamtumira, por nuk i dihet kurrë në futboll.
“E kam pasur ëndërr të luaj në Premierligë. E bëra këtë për shtatë vjet në njërin prej klubeve më të mëdha në botë dhe tani ka ardhur koha për një sfidë të re mbase”, theksoi ai.
(Kosova Sot Online)