Lojtarët e Kosovës i urojnë shërim të shpejtë Zenelit
Pasi u konfirmua se Arbër Zeneli do të mungojë në ndeshjen kundër Bullgarisë dhe mund t’i nënshtrohet edhe një operacioni për lëndimin e tij në gju, bashkëlojtarët e tij në Kombëtaren e Kosovës e kanë shprehur mbështetjen e tyre për të.
Arbër Zeneli pësoi lëndim në gju në minutën e 31-të të ndeshjes së mbrëmshme në Podgoricë kundër Malit të Zi, që përfundoi me rezultat 1:1. Ai u kthye menjëherë dje në Prishtinë, ku i bëri testet fillestare mjekësore.
Pas këtyre testeve mjekësore u kuptua se ai s’do të ketë mundësi të luajë në ndeshjen e së hënës kundër Bullgarisë, po ashtu në kuadër të kualifikimeve për EURO 2020. Ky lajm i ka nxitur futbollistët e Kosovës të postojnë në rrjetet sociale mesazhe për Zenelin.
(Kosova Sot Online)