FFK-ja kërkon që Ligji për Sponsorizim të miratohet në seancën e ardhshëm

Në mesin e shumë reagimeve për mosmiratimin e Ligjit për Tatimin e të Ardhurave në Korporatave, i cili do ta hapte rrugën për Ligjin e Sponsorizimit në fushën e Sportit, Kulturës dhe Rinisë, është edhe Federata e Futbollit e Kosovës.

Përmes një deklaratë të lëshuar në faqen zyrtare, Komiteti Ekzekutiv i Federatës së Futbollit të Kosovës u ka kërkuar deputetëve që këtë ligj ta miratojnë qysh në seancën e ardhshme, raporton Gazeta Express.

Reagimi i plotë i FFK-së:

Komiteti Ekzekutiv i Federatës së Futbollit të Kosovës kërkon nga Kuvendi i Kosovës që sa më parë, në seancën e radhës, të votojë amendamentimin e Ligjit për Tatimin e të Ardhurave në Korporata, i cili e mundëson harmonizimin me Ligjin për Sponsorizim, i cili është jetik për zhvillimin e sportit dhe në veçanti për futbollin.

Mosmiratimi i këtij Ligji në seancën paraprake ka zhgënjyer tej mase komunitetin sportiv dhe njerëzit që për shumë dekada kanë qenë afër sportit, e të cilët nuk kanë kursyer asgjë për ta mbajtur gjallë aktivitetin e klubeve.

Ne, si KE i FFK-së, i bëjmë thirrje deputetëve të Kuvendit të Kosovës që në seancën e radhës të jenë në numër të mjaftueshëm dhe ta kalojnë amandamentimin e këtij ligji, ngase kjo do të ishte përkrahja e tyre më e madhe për sportin në këtë periudhë.

Në kohën kur sporti ynë po i radhit sukseset e njëpasnjëshme e kur futbolli është bërë ambasadori më i mirë i vendit në botë dhe sukseset e djemve tanë të Kombëtares po na bëjnë krenarë të gjithëve, është obligim i secilit prej nesh që të jemi të përgjegjshëm dhe të punojmë për ta përkrahur sa më shumë sportin.

Miratimi i këtij ligji i hap rrugë zhvillimit të futbollit dhe klubeve tona dhe njëherësh ua mundëson dhe i josh kompanitë e shumta që t’i përkrahin klubet e futbollit për zhvillim edhe më të hovshëm, por krijon mundësi edhe për përmirësim të infrastrukturës. FFK falënderon të gjithë deputetët që po i japin mbështetje këtij ligji dhe shpreson se në seancën e radhës amandamenti që mundëson harmonizimin e këtyre ligjeve do të kalojë me shumicë votash.

Sportistët tanë po e bëjnë punën e tyre me krenari e përgjegjësi në çdo arenë, tani mbetet radha e deputetëve që të dëshmojnë se janë përkrahës të njëmendtë të zhvillimit të sportit, duke e votuar Ligjin në fjalë.

Bashkë, drejt sukseseve të mëdha!

Me respekt,

Komiteti Ekzekutiv i FFK-së

Agim Ademi, president

(Kosova Sot Online)