Maskota e Man Unitedit zemëron tifozët kundërshtarë me talljet e tij

Përkundër që ishte vetëm ndeshje miqësore, maskota e Manchester Unitedit, “Fred the Red”, i zemëroi tifozët e Leeds Unitedit gjatë ndeshjes së djeshme, duke u tallur me ta përmes disa veprimeve.

Manchester Unitedi i vazhdoi përgatitjet për sezonin e ardhshëm me një fitore me rezultat 4:0 kundër Leeds Unitedit, në Perth të Australisë. Golat i shënuan Mason Greenwood, Marcus Rashford, Phil Jones dhe Anthony Martial.

Përkundër që ndeshja po zhvillohej në skajin tjetër të botës, që të dyja skuadrat kishin të pranishëm tifozë nga Anglia në stadiumin “Optus”, ku ishin të pranishëm mbi 55 mijë njerëz.

Për shkak të rivalitetit historik mes Manchester Unitedit dhe Leeds Unitedit, stadiumi australian ishte i mbrojtur nga roje sigurimi shtesë, pas shqetësimeve se mund të ketë përleshje mes tifozëve para se të fillonte ndeshja.

Megjithatë, ndeshja përfundoi pa ndonjë incident serioz, mirëpo gjatë ndeshjes pati një moment që i zemëroi mjaft shumë tifozët e Leeds Unitedit.

Fred the Red, maskota e Manchester Unitedi, vendosi të tallet me tifozët e klubit kundërshtar dhe të bënte spektakël në stadiumin australian.

Siç shihet në video, veprimet e tij nuk i pëlqyen aspak kundërshtarëve dhe madje një tifoz e gjuajti maskotën me shishe, para se rojet e sigurimit të ndërhynin, duke u futur mes dy palëve.

Manchester Unitedi do t’i vazhdojë përgatitjet për sezonin e ardhshëm me ndeshjet kundër Interit, Tottenhamit dhe Milanit, para se ta fillojë sezonin e ri të Premierligës me ndeshjen kundër Chelseat në “Old Trafford”. 

(Kosova Sot Online)