Eliminohet edhe Kukësi, mbetet vetëm Partizani

Ka përfunduar që në turin e parë aventura e klubeve shqiptare të eliminatoret e Europa Leagues, pasi si Kukësi e Laçi që ishin të pafat në short, ashtu edhe Teuta, nuk ia dolën të kualifikohen për në raundin tjetër.

Durrsakët e Blendi Shkëmbit gjetën përballë letonezët e Ventspilsit, një skuadër lehtësisht e kalueshme, por që ashtu si një vit më parë kur eliminoi Luftëtarin në mënyrë të befasishme, bëri të njëjtën gjë edhe këtë sezon, përballë Teutës.

Pasi triumfuan me rezultatin e thellë 3-0 në shtëpi, letonezët u mbrojtën fort në “Niko Dovana” dhe arritën të nxjerrin vetëm një herë topin nga rrjeta, duke humbur 1-0 dhe kaluar me meritë në turin e dytë eliminator të Europa Leagues me rezultatin total 3-1.

Të njëjtin fat pati edhe Kukësi, që dhuroi një paraqitje mjaft të mirë një javë më parë në Hungari, përballë një rivali emërmadh si Debreceni, por në fund pa të humbiste me rezultatin e thellë 3-0.

Sfida e mbrëmjes së sotme në “Elbasan Arena” ishte një “mision i pamundur” për verilindorët që gjithsesi tentuan të bëjnë befasinë dhe kaluan shpejt në avantazh me Et’hemin. I njëjti futbollist pati një mundësi të artë të dyfishojë shifrat në fundin e pjesës së parë, por gaboi përballë portierit hungarez Nagy.

Në pjesën e dytë skuadra e Gjokës tentoi disa herë të gjejë golin që do të “ndizte” entuziazmin dhe shpresat për kualifikim, por në momentin më të mirë, pësoi një gol nga pakujdesia e portierit Frashëri, duke shndërruar në një mirazh, kalimin për në turin tjetër.

Sfida e mbrëmjes së sotme përfundoi në barazim 1-1, me hungarezët që vijojnë më tej falë rezultatit të përgjithshëm 4-1, ndërsa Kukësit nuk i mbetet gjë tjetër veçse të fillojë punën për të përgatitur sezonin e ardhshëm të Superligës.

Përfaqësim dinjitoz dhe përtej pritshmërive bëri laçi përballë izraelitëve të Hapoel Be’er Shevas, një skuadër me mjaft eksperiencë në kupat europiane dhe me një buxhet shumë të lartë në dispozicion.

Nën drejtimin e Sulejman Starovës, bardhezinjtë morën një barazim 1-1 në Kurbin javën e kaluar dhe luajtën shanset e tyre për kualifikim mbrëmjen e sotme në Be’er Sheva, ku humbën me rezultatin minimal 1-0 dhe mbetën jashtë kompeticionit.

Tashmë e vetmja skuadër shqiptare që “do të mbajë flamurin” në Europë, është Partizani kampion, që u eliminua nga eliminatoret e Champions League, por do të vijojë garën në Europa League, ku do të gjejë përballë moldavët e Sherif Tiraspolit. 

(Kosova Sot Online)