Marotta: Conte duhet të ketë durim

Menaxheri i përgjithshëm i Interit, Beppe Marotta, thotë se derisa i kupton vështirësitë me të cilat po përballet trajneri Antonio Conte, italiani duhet të ketë më shumë durim.

Conte është ankuar se ende nuk e ka asnjë sulmues të njohur në skuadër, me Lautaro Martinezin ende në pushim pas obligimeve që kishte me Kombëtaren e Argjentinës në Kupën e Amerikës dhe dështimin e deritanishëm për ta arritur marrëveshje për Romelu Lukakun dhe Edin Dzekon.

“Një sulmues do të jetë ekspert, një tjetër do të jetë një i ri me shumë potencial”, tha Marotta për Gazzetta dello Sport.

“Nuk do të përmend emra, nuk është e përshtatshme. Por e përsëris, detyra jonë është të ndërtojmë një ekip të fortë, duke i kërkuar lojtarët më të mirë të mundshëm. Shumicën e punës e kemi mbaruar tashmë”, shtoi ai.

Ai i bëri thirrje Contes të ketë më shumë durim sepse afati kalimtar veror është i gjatë.

“Ne i kuptojmë vështirësitë me të cilat përballemi. Mungesa e sulmuesve e kufizon atë shumë dhe e detyron të punojë më fort. Megjithatë, tregu është i gjatë ketë verë dhe ende nuk ka nisur mirë. Duhet të kemi më shumë durim”, shtoi ai.

(Kosova Sot Online)