Real Madridi debuton në La Liga në një udhëtim të vështirë, pa blerjet e reja!

Të premten zyrtarisht ka startuar La Liga.

Surprizat nuk munguan me Athletic Bilbaon që shtangu në fund Barcelonën kampione në fuqi me një supergol të Aduriz.

E shtuna është dita e Real Madridit që do të bëjë debutimin në sezonin 2019/2020 në udhëtim ndaj Celta Vigos.

Në orën 17:00 Los Blancos i pret një ndeshje shumë e vështirë për më tepër që trajneri Zinedine Zidane nuk do të ketë të gatshëm yllin e ri të ekipit belgun Eden Hazard i cili është dëmtuar dhe do të humbasë tre sfidat e para të kampionatit.

Pavarsisht blerjeve të shumta në këtë merkato, si Hazard, Mendy, Militao, Jovic e Rodrygo që i kanë kushtuar Realit më shumë se 300 milionë euro, ndaj Celtas do të zbresë në fushë garda e vjetër, madje edhe Bale që ishte me valixhe në duar pritet ta nisë ndeshjen si titullar.

Në Vigo, Reali ka fituar 3 nga 4 ndeshjet e fundit në kampionat dhe shpreson që t’i buzëqeshë fati edhe sot për të krijuar menjëherë një diferencë prej tre pikësh ndaj Barçës në klasifikim.

(Kosova Sot Online)