Driton Kuka në qiellin e shtatë, e komenton suksesin e Majlindës në Botëror

Driton Kuka e ka komentuar suksesin e Majlinda Kelmendit në Kampionat Botëror. Trajneri i suksesshëm ndihet krenar me suksesin e garuesve të tij

Driton Kuka ndihet i lumtur për medaljen e bronztë që e fitoi Majlinda Kelmendi sot në Kampionat Botëror.

Xhudistja pejane shkëlqeu në Botërorin e Japonisë, ku fitoi medalje, edhe pse nuk arriti ta fitonte titullin e tretë të kampiones botërore.

Kelmendi u ndal në gjysmëfinale nga kampionia aktuale botërore, Abe Uta, por e mposhti portugezen Joana Ramos në luftën për medalje.

Dhe, Kuka e ka shprehur gëzimin e tij për këtë sukses, i cili e përcjellë atë të Distria Krasniqit, e cila të dielën e fitoi po ashtu medaljen e bronztë.

“Ditë e mrekullueshme për Sportin e Kosovës dhe mbarë popullin Shqiptar kudo që gjendet! Medalja e dytë vjen nga Botërori në Tokio! 8 Minuta tempo e çmendur e Majlindes në Gjysëmfinale kundër Japonezes së dytë që u takua sot nuk mjaftuan që Japonezes që krejt kohën i iku luftës të penalizohet për herë të 3 që do sjellte fitoren! Majlinda fiton medaljen e tretë në Kampionate Botërore! Krenaria ime po rritet me ju nxëneësit e mi! Çdo minutë të punës time me ju e paçit hallall tërë jetën!”, ka shkruar Kuka.

Në ditët në vazhdim, në “Tokyo 2019” do të garojnë edhe xhudistët tjerë kosovarë, Akil Gjakova, Nora Gjakova dhe Loriana Kuka. 

(Kosova Sot Online)