Kastrati i dërgon mesazh Challandesit, i cili s’e zgjodhi për ndeshjet e Kosovës
Në mesin e futbollistëve të ftuar nga trajneri Bernard Challandes për dy ndeshjet e radhës të Kosovës, e cila u publikua dje, nuk ishte edhe ylli kosovar i Lokomotiva Zagrebit, Lirim Kastrati.
Kosovës i mungojnë pesë futbollistë – Arbër Zeneli, Milot Rashica, Herolind Shala, Benjamin Kololli dhe Hekuran Kryeziu – për ndeshjet kundër Republikës Çeke dhe Anglisë, të vlefshme për kualifikimet në Kampionatin Evropian 2020.
Përkundër këtyre mungesave, trajneri Bernard Challandes vendosi t’u besojë disa futbollistëve të tjerë e jo Lirim Kastratit, i cili herën e kaluar shkëlqeu për Kosovën U-21 dhe që nga atëherë ka qenë mjaft mbresëlënës në kampionatin kroat.
Pasi u publikua lista e lojtarëve të zgjedhur nga Challandes, Kastrati i shënoi dy gola në fitoren me rezultat 6:1 kundër Slaven Belupos, në kuadër të xhiros së shtatë të ligës së nivelit të parë të futbollit në Kroaci.
Pas kësaj ndeshjeje, ai e shpërndau një postim të një faqeje në Instagram, ku Challandes u kritikua për mungesën e Kastratit për dy ndeshjet e shtatorit.
“Lirim Kastrati e përshëndeti sonte Bernard Challandesin me dy gola dhe një asistim, duke i treguar se e ka merituar të luajë në dy ndeshjet e shtatorit”, shkruhet në postimin e ripublikuar nga Kastrati.
“Shtatë ndeshje në sezonin e ri me Lokomotivën, pesë gola dhe tri asistime. Asnjë futbollist i Kosovës nuk po kalon formë më të mirë sesa Kastrati. Raketa e Lokomotivës dhe Kosovës.
Meqenëse nuk u ftua nga ekipi i parë i Kombëtares së Kosovës, Kastrati pritet të jetë pjesë e listës për Kombëtaren U-21.
(Kosova Sot Online)