Antonio Conte e akuzon shtypin italian për nxitje të urrejtjes

  • 24 shtator 2019 - 17:33
Antonio Conte e akuzon shtypin italian për nxitje të urrejtjes

Antonio Conte e ka sulmuar shtypin italian duke e akuzuar për nxitje të urrejtjes dhe pakënaqësive, para ndeshjes së Interit kundër Lazios në Serie A të mërkurën mbrëma.

Interi përballet me rivalin e moçëm, Juventusin, në derbin italian më 6 tetor, dhe tashmë mediat kanë shkruar se Conte do të pritet në mënyrë armiqësore kundër ish-klubit.

Conte tha të martën në një konferencë për media se ndihet i tronditur me shkrimet për të dhe ish-klubin e tij.

“I kam lexuar disa lajme për ndeshjen mes Interit dhe Juventusit si një takim ku mua do të më ofendojnë shumë. Jam i tronditur sepse kushdo që i shkruan këto duhet të ketë më shumë ndërgjegje dhe të kuptojë se çka shkakton provokime dhe se çfarë ndjenjash iu ngjallin lexuesve”, tha Conte.

“Sikur të isha redaktor i gazetës, do t’i shqelmoja në prapanicë. Kushdo që i shkruan dhe i lëshon këto gjera duhet të marrë përgjegjësi shtesë sepse sot çdo gjë publikohet në rrjetet sociale dhe kjo ndjell urrejtje dhe pakënaqësi”, shtoi ai.

(Kosova Sot Online)