Behrami përjashtohet nga Sioni, por klubi mundohet ta arsyetojë atë

  • 28 shtator 2019 - 09:56
Behrami përjashtohet nga Sioni, por klubi mundohet ta arsyetojë atë

Valon Behrami iu bashkua me shumë bujë skuadrës zvicerane Sion gjatë afatit kalimtar veror.

Mesfushori kosovar me pasaportë zvicerane u rikthye në elitën e futbollit zviceran pas një karriere të gjatë e të suksesshme në liga të forta si ajo e Serie A apo Liga Premier. Edhe pse u prit jashtëzakonisht mirë te Sioni, tani gjërat nuk janë të qeta pasi lojtari është përjashtuar nga klubi. E përditshmja zvicerane Blick ka shkruar se Behrami është përjashtuar ditën e premte nga ekipi i parë.

Por në një përgjigje për gazetën zviceran, klubi është munduar ta arsyetojë këtë vendim, duke thënë se Behrami nuk është grumbulluar për faktin se mund të lëndohet.

“Behrami nuk do të jetë pjesë e ekipit për ndeshjen e ardhshme për shkak se mund të lëndohet, pasi luajmë në fushë me bar artificial. Për këtë arsye nuk ka luajtur as në ndeshjet e tjera”. “Do të shohim se si do të shkojnë gjërat pas këtij takimi përpara se të kthehet në ekip. Përfundimisht, si ekip kemi nevojë për Valonin”, ishte përgjigjja e Sionit për mediat zvicerane.

Mbetet të shihet nëse Behrami do të luaj nga java e ardhshme për Sionin, apo do të vazhdoj suspendimi i tij. 

(Kosova Sot Online )