Fitojnë dy klubet gjilanase, Drita e merr kreun e Superligës

Xhiroja e tetë e Ipko Superligës së Kosovës solli lajme të mira për dy klubet gjilanase, Dritën dhe Gjilanin, pasi që ato shënuan fitore. Madje, tre pikët e fituara nga kjo xhiro bënë që Drita të ngrihet në pozitën e parë në tabelën e Superligës.

Drita 5:1 Vushtrria

Në stadiumin e qytetit në Gjilan, Drita i siguroi tifozët e vet duke e siguruar një fitore bindëse me rezultat 5:1 kundër Vushtrrisë dhe duke e marrë kreun e tabelës së elitës së futbollit kosovar, raporton Gazeta Express.

Drita u tregua e rrezikshme me disa raste të mira qysh në minutat e parë të ndeshjes, mirëpo golin e parë e gjeti në minutën e 21-të për Cardosos. Para se të mbyllej pjesa e dytë, Ian Augusto i Vushtrrisë shënoi autogol për ta dyfishuar epërsinë e vendasve.

Me të njëjtin rrjedhë filloi edhe pjesa e dytë e ndeshjes. Betim Haxhimusa (50’, 84’) dhe Xhevdet Shabani (62’) shënuan për Dritën, ndërsa golin ngushëllues për Vushtrrinë e shënoi Matheus de Paula nga pika e penalltisë.

Me këtë fitore, Drita bëhet lidere e tabelës së Superligës së Kosovës, me 17 pikë të grumbulluara nga tetë ndeshjet e para (pesë fitore, dy barazime dhe një humbje) – baras pikë me Llapin dhe Ballkanin.

Ndërsa, kjo ishte disfata e pestë për Vushtrrinë, që sezonin e kaluar e fitoi titullin e Ligës së Parë, nivelit të dytë të futbollit në Kosovë. Vushtrria radhitet e 11-ta në Superligë, me vetëm pesë pikë të grumbulluara deri më tash.

Flamurtari 1:4 Gjilani

Fitore në kuadër të xhiros së tetë shënoi edhe Gjilani, përkundër që ishte mysafir i Flamurtarit në stadiumin “Xhemajl Ibishi” në Prishtinë.

Gjilani e mbylli pjesën e parë me epërsi prej dy golash, përmes dy golave të shënuar nga Gerhard Progni, në minutën e 20-të dhe të 30-të.

Bedri Greca e thelloi epërsinë e gjilanasve pas nëntë minutave lojë në pjesën e dytë, ndërsa, 14 minuta para fundit të ndeshjes, Flamurtari u përgjigj me një gol të shënuar nga Festim Krasniqi. Në momentet e fundit të ndeshjes, Gjilani kaloi në epërsi 4:1 falë Fiton Hajdarit dhe gabimit në mbrojtjen e Flamurtarit

Me këtë fitore, Gjilani radhitet në pozitën e pestë, mirëpo ka baras pikë me Feronikelin në vendin e katërt dhe vetëm dy pikë më pak sesa Drita në vendin e parë.

Në anën tjetër, Flamurtari bie në pozitën e nëntë në tabelën e Superligës, pasi që i ka grumbulluar vetëm shtatë pipkë nga tetë ndeshjet e para – dy fitore, një barazim dhe pesë humbje.

Prishtina dhe Drenica janë të vetmet ekipe që s’e kanë zhvilluar ndeshjen e xhiros së tetë, pasi që Federata e Futbollit të Kosovës vendosi ta shtyjë ndeshjen e tyre për ta ruajtur fushën e stadiumit “Fadil Vokrri” në gjendje të mirë për ndeshjet e Kosovës.

(Kosova Sot Online)