UEFA padit Real Madridin dhe Bruggen

Organi qeverisës i futbollit në Evropë, UEFA, ka hapur procedurë disiplinore ndaj Real Madridit dhe Club Brugget, pas ndeshjes mes këtyre dy klubeve të martën në “Santiago Bernabeu”, në kuadër të Grupit A të Ligës së Kampionëve.

Real Madridi u detyrua të luftojë për një barazim 2:2 në shtëpi kundër Club Brugge të martën në kuadër të Ligës së Kampionëve. Mirëpo, pas ndeshjes, UEFA konfirmoi se ka hapur padi disiplinore ndaj të dyja klubeve.

Reali akuzohen për vonesën në fillimin e ndeshjes, Brugge për shkak të gjuhës ofenduese.

Komiteti Disiplinor, i Etikës dhe Kontrollit i UEFA-s tha të enjten se Real Madridi përballet me akuzë për shkak të vonesës së fillimit të ndeshjes në “Santiago Bernabeu”, në pajtim me Artikullin 11 (2) në Regullativën Disiplinore të UEFA-s.

Ndërkohë, Brugge pritet të hetohet për shkeljen e Artikullit 15 (1), pasi mesfushori Rudy Vormer pretendohet se iu kishte drejtuar gjyqtarit kryesor me gjuhë ofenduese, pasi ishte ndëshkuar me kartonin e dytë të verdhë në minutën e 84-të të ndeshjes.

Komiteti Disiplinor, i Etikës dhe Kontrollit të UEFA-s do të takohet për t’i hetuar këto akuza më 17 tetor, kur edhe do të bëhet publik masa e ndëshkimit për dy klubet.

(Kosova Sot Online)