20 komuna i thonë “Po” Panairit të Sportit 2019

Komiteti Olimpik i Kosovës do të vazhdojë me masivizimin e sportit në Kosovë, duke organizuar aktivitete të cilat kanë për qëllim joshjen e fëmijëve për t’u marrë me sport.

Për këtë, KOK do të organizojë edicionin e pestë të Panairit të Sportit, i cili do të mbahet më 22 tetor në shumicën e komunave të Kosovës. 22 tetori koincidon me pesë vjetorin e njohjes së Komitetit Olimpik të Kosovës nga Bordi Ekzekutiv i Komitetit Olimpik Ndërkombëtar. Deri më tani, komuna e Prishtinës, Ferizaj, Mitrovica, Drenasi, Vushtrria, Deçani, Obiliqi, Vitia, Kaçaniku, Fushë Kosova, Rahoveci, Podujeva, Lipjani, Gjilani, Gjakova, Hani i Elezit, Peja, Suhareka, Istogu, dhe Malisheva i kanë thënë ‘PO’ organizimit të Panairit.

Panairi i Sportit ka për qëllim të promovojë sportet, klubet dhe rezultatet e arritura nga sportistët e komunës tuaj, po ashtu të ju krijojë mundësinë fëmijëve të shkollave fillore që të shohin nga afër praktikimin e sporteve dhe që ata të kenë mundësinë të regjistrohen në klubet e sportet që ata pëlqejnë më shumë. OK do të mbulojë një pjesë të shpenzimeve të komunave për organizimin e Panairit, derisa pret që edhe komunat tjera të reflektojnë me organizim.

(Kosova Sot Online )