Gjilani me dy skuadra në krye të Superligës, falë fitores së Dritës ndaj Ballkanit
Drita e ka mundur 2:0 Ballkanin në një duel të tensionuar për kreun e Ipko Superligës, ndërkohë që Prishtina e mposhti Ferizajn për t’u kthyer te fitorja pas dy ndeshjeve.
Izair Emini dhe Gilberto Fortunato shënuan nga një herë secili në pjesën e parë, për fitore e Dritës të dielën në stadiumin Selami Osmani në Gjilan.
Kjo fitore nënkupton se Gjilani përfaqësohet momentalisht me dy skuadra në kreun e Superligës, pasi Drita dhe Gjilani grumbullojnë nga 21 pikë në pozitat një dhe dy, përkatësisht.
Ballkani dhe Llapi ngelin prapa tyre me nga 20 pikë secila.
Drita e fitoi takimin qysh në pjesën e parë. Emini shënoi për epërsinë e parë në takim pas vetëm pesë minutave lojë, para se Fortunato ta dyfishonte epërsinë në minutën e 24-të.
Ballkani ishte i pafuqishëm të shënojë dhe iu vështirësuan gjërat në pjesën e dytë, kur Edmon Turku u përjashtua me karton të kuq për një ndërhyrje të ashpër dhe pas tij edhe trajneri Ismet Munishi.
Ndërkohë, në ndeshjen e fundit të javës së 10-të, po ashtu të zhvilluar sot, Prishtina e mundi Ferizaj 2:0 në udhëtim, duke e rigjetur rrugën e fitores pas një humbjeje dhe një barazimi në dy javët e kaluara.
Meriton Korenica në minutën e 23-të dhe Ahmed Januzi në të 86-të realizuan për fitoren e pestë të bardhekaltërve këtë sezon në ligë.
Klubi nga kryeqyteti tani grumbullon 17 pikë në pozitën e pestë, katër më pak se liderët Drita dhe Gjilani.
Ferizaj, ndërkohë, ngel në pozitën e nëntë, që dërgon një rang më poshtë, Ligën e Parë.
(Kosova Sot Online)