“Vedat Muriqi priste ftesë nga Kombëtarja e Turqisë!”

  • 25 October 2019 - 21:42
“Vedat Muriqi priste ftesë nga Kombëtarja e Turqisë!”

Gjatë kohës sa Vedat Muriqi ishte pjesë e Giresusporit, kishte shprehur dëshirën që të luajë për Kombëtaren e Turqisë, por kërkesa e tij u la pa përgjigje nga atëbotë përzgjedhësi Fatih Terim.

Kështu kanë raportuar të premten gjatë ditës disa mediume në Turqi.

Muriqi në shkurt të vitit 2015 e fitoi nënshtetësinë turke dhe kërkesa e tij ishte që të luajë për Turqinë.

Ekipi kombëtar i futbollit i Kosovës ishte formuar rishtazi dhe në atë kohë nuk kishte të drejtë të luante në gara ndërkombëtare dhe për ta përfaqësuar Turqinë, kërkoi ndihmën e ekipit të tij.

Kërkesa e tij u përcoll te Fatih Terimi, por nuk mori përgjigje për një kohë të gjatë. 

Sipas mediumeve turke, pasi Terim nuk i kishte kthyer përgjigje, Muriqi nuk priti dhe pranoi të luante për Kosovën.

Sot është bërë lojtar i rëndësishëm te Kosova dhe falë paraqitjeve të mira me “Dardanët” dhe Fenerbahçen është bërë një nga lojtarët më të kërkuar nga klube të ndryshme evropiane.

Nga viti 2016 25-vjeçari për Kosovën ka luajtur 23 ndeshje dhe ka shënuar tetë gola dhe tri asistime.

(Kosova Sot Online)