Tre kandidatët e mundshëm për ta zëvendësuar Valverden në Barçë

Ronald Koeman, Marcelo Gallardo dhe Erik Ten Hag janë tre trajnerët e mundshëm për ta zëvendësuar Ernesto Valverden në postin e trajnerit të Barcelonës.

Barazimi pa gola në Camp Nou kundër Slavia Pragës në Ligën e Kampionëve të martën, ka bërë që presioni ndaj Valverdes të vazhdojë të rritet.

Gjiganti katalonas po kalon nëpër një periudhë të çuditshme dhe gazeta e afërt me klubin, Mundo Deportivo, i ka bërë të ditur emrat e kandidatëve të mundshëm për pasuesin e ish-trajnerit të Athletic Bilbaos.

Koeman, momentalisht trajner i ekipit kombëtar të Holandës, është opsioni më i mundshëm, duke qenë se është legjendë e Barcelonës dhe e njeh shumë mirë klubin.

Megjithatë, ai nuk mund ta marrë drejtimin e katalonasve para përfundimit të Kampionatit Evropian 2020.

Opsioni i dytë është Gallardo, i cili i ka fituar dy tituj të Copa Libertadores që prej vitit 2015 me River Plate. Bordi i Barçës e pëlqen stilin e lojës së tij.

Opsioni i tretë është Ten Hag i Ajaxit. Ai e udhëhoqi klubin holandez drejt gjysmëfinales në Ligën e Kampionëve sezonin e kaluar duke i eliminuar Real Madridin dhe Juventusin gjatë rrugës. 

(Kosova Sot Online)