Zidane i reagon drejtorit të PSG-së: Mund të them çfarë të dua për Mbappen
Trajneri i Real Madridit, Zinedine Zidane, ia ka bërë të qartë Paris Saint-Germainit se s’mund ta heshtin atë dhe se ai mund të flasë çfarëdo që të dojë kur vjen fjala te Kylian Mbappe.
Lidhja e sulmuesit francez Kylian Mbappe me trajnerin e PSG-së, Thomas Tuchel, është vënë në dyshim në të kaluarën dhe, pasi që Real Madridi dëshiron të përforcohet në fazën e sulmit, madrilenët janë spekuluar për transferimin e Mbappes në afatet e ardhshme kalimtare.
Zidane është njëri ndër figurat që e ka lavdëruar më së shumti sulmuesin 20-vjeçar, duke ia përkujtuar PSG-në ëndrrën e Mbappes për të luajtur në Santiago Bernabeu, duke nxitur kështu një reagim të ashpë nga drejtori sportiv i klubit francez, Leonardo.
Lufta e fjalëve, megjithatë, do të vazhdojë për aq sa ta sheh të nevojshme Zindane, pasi që ai i paralajmëroi liderët e Ligue 1 se ai nuk pranon të heshtet nga të tjerët në këtë temë.
“Unë nuk kam thënë asgjë, vetëm atë që e ka thënë lojtari, se ëndrra e tij është që një ditë të vijë të luajë këtu”, ka thënë heroi i Francës në Kupën e Botës 1998, në një konferencë për shtyp.
“Të gjithë thonë çfarë të donë. Unë nuk do të them asgjë tjetër. Unë thjesht e thashë atë që e ka thënë edhe lojtari një ditë, se ëndrra e tij do të ishte që një ditë ta veshë fanellën e Real Madridit”.
“Unë mund ta them këtë sërish e sërish, çdo ditë. Nuk kam asgjë tjetër për t’i thënë Leonardos, unë mund të them çfarë të dua”.
(Kosova Sot Online)