Ranglista e FIFA-s: Kosova mund të fitojë shumë pikë nga ndeshja kundër Anglisë
Përderisa Kosova s’mund të kualifikohet për Kampionatin Evropian 2020 nga Grupi A pavarësisht rezultatit kundër Anglisë, skuadrës së Bernard Challandes do t’i ndihmonte fitorja ose barazimi kundër Anglisë edhe për ngritjen në ranglistën e FIFA-s, që i radhit të gjitha Kombëtaret e botës.
Kosova aktualisht radhitet në pozitën e 114-të në listën e FIFA-s, me 1184 pikë të grumbulluara gjithsej, ndërsa Anglia radhitet e katërta, me gjithsej 1651 pikë të grumbulluara.
Me fitore kundër Anglisë, Kosova do t’i fitonte 21.43 pikë të vlefshme për ranglistën e FIFA-s, nga barazimi 8.93 pikë, ndërsa nëse pëson disfatë i humb 3.57 pikë.
Sipas rregullave të FIFA-s për këtë ranglistë, ndeshjet miqësore kanë më pak vlerë sesa ato me karakter garues. Në numrin e pikëve të fituara nga secila ndeshje ndikon edhe niveli i kundërshtarit.
Algoritmi i FIFA-s i grumbullon pikët sipas formulës së paraqitur më poshtë:
P=Pmëparshme+R*(W-We)
Me shkronjën P shënohet numri i pikëve total.
R – Rëndësia e ndeshjes
Pmëparshme – Pikët në ranglistën e FIFA-s, para fillimit të kësaj ndeshjeje
R=5 për ndeshjet miqësore jashtë kalendarit të ndeshjeve ndërkombëtare
R=10 për ndeshjet miqësore brenda kalendarit të ndeshjeve ndërkombëtare
R=15 për ndeshjet e fazës së grupit në Ligën e Kombeve
R=25 për ndeshjen eliminatore dhe të play-offs në Ligën e Kombeve
R=25 për ndeshjet kualifikuese në garat e konfederatave dhe për kualifikim në Kupën e Botës
R=35 për ndeshjet e fazës eliminatore në garat e konfederatave deri në fazën çerekfinale
R=40 për ndeshjet e fazës eliminatore në garat e konfederatave pas fazës çerekfinale
R=50 për ndeshjet e Kupës së Botës deri në fazën çerekfinale
R=60 për ndeshjet e Kupës së Botës pas fazës çerekfinale
W – Rezultati i ndeshjes
Fitore=1; Barazim=0.5; Disfatë=0
We – Rezultati i pritur e ndeshjes
dr– diferenca në rangim mes dy skuadrave
FIFA e përditëson ranglistën e kombëtareve pas cdo afati të ndeshjeve kombëtare. Që nga koha kur Bernard Challandes e ka marrë drejtimin e Kosovës, “Dardanët” vazhdimisht janë ngritur në këtë ranglistë, ndërsa tani e mbajnë pozitën më të lartë ndonjëherë, atë të 114-të.
(Kosova Sot Online)