UEFA e Federata italiane ofrojnë ndihmë për Shqipërinë

Presidenti i Federatës Shqiptare të Futbollit, Armand Duka, ka bërë të ditur se ai ka marrë telefonata nga presidenti i UEFA-s, Aleksander Ceferin, dhe shumë persona të tjerë në pozita, të cilët i ofruan ndihmë.

15 persona kanë humbur jetën dhe mbi 600 janë lënduar nga disa tërmete të fuqishme që kanë goditur Shqipërinë.

Përveç presidentit të UEFA-s Ceferin, ndihmë për Shqipërinë, sipas Dukës, kanë ofruar edhe zëvendëspresidenti Sandor Csanyi, presidenti i Federatës italiane Gabiele Gravina, trajnerët Di Diasi, Panucci e Reja.

“Miqtë e FSHF-së dhe Shqipërisë solidarizohen me ne, në këtë ditë të vështirë! Mora telefonata, mesazhe dhe propozime për ndihmë konkrete nga Presidenti i UEFA-s, Aleksander ëeferin, Zv/Presidenti Sándor Csányi, Presidenti i Federatës Italiane Gabriele Gravina, trajnerët De Biasi, Panucci, Reja e shumë miq të tjerë”, ka bërë të ditur Duka, përmes llogarisë së tij në Facebook.

“Biseda vëllazërore lidhur me situatën e krijuar nga tërmeti pata edhe me homologët e mi, Presidentin e Federatës së Futbollit të Kosovës Agim Ademi dhe Presidentin e Federatës së Futbollit të Maqedonisë së Veriut, Muamed Sejdini, të cilët shprehën solidaritetin dhe mbështetjen e tyre. Mirënjohje!”

Tërmeti i parë i fuqishëm i magnitudës 6.4 goditi Shqipërinë rreth orës 03:50 të ditës së martë dhe kishte epiqendrën në Detin Adriatik, 40 km larg kryeqytetit, Tiranës dhe 10 km në veri të Durrësit. Lëkundje të tjera më të lehta janë ndjerë pas tij. Një tjetër tërmet i fuqishëm është regjistruar në orën 7:10 me magnitudë 5.4.

Deri tani raportohet për disa pallate të shembura në qytetin e Durrësit dhe fshatin Thumanë dhe dhjetëra familje kanë mbetur nën rrënoja, ndërsa qytetarët dhe ekipet e shpëtimit po tentojnë të ndihmojnë banorët e bllokuar. 

(Kosova Sot Online)