Klubi Skënderbeu u del në ndihmë të prekurve nga tërmeti në Shqipëri
Skënderbeu ka bërë të ditur se do t’i dhurojë të gjitha fitimet e biletave të shitura nga sfida e javës së 15-të ndaj Vllaznisë për të prekurit nga tërmeti në Shqipëri.
51 persona kanë mbetur të vdekur dhe qindra të tjerë janë lënduar shkaku i një seri tërmetesh që e kanë goditur zonën e Durrësit në Shqipëri që nga orët e hershme të mëngjesit të së martës.
Për personat e tjerë të prekur nga tërmeti është ofruar strehim nëpër tenda të ngritura në stadiume, si në Durrës e Tiranë, ndërkohë që klubi korçar ka bërë të ditur se do t’i dhurojë paratë e ndeshjes vijuese për të gjithë këta persona.
Skënderbeu në javën e 14-të, që do të luhet fundjavën e ardhshme, udhëton drejt Durrësit për t’u përballu ndaj Teutës, ndërsa sfidën e radhës e luan në shtëpi ndaj Vllaznisë.
Klubi ka bërë apel që tifozët të jenë sa më të shumtë në numër në mënyrë që të mblidhen sa më shumë fitime nga biletat e shitura.
Postimi i Skënderbeut:
Klubi i Futbollit “Skënderbeu” ka vendosur të dhurojë të gjitha fitimet e ndeshjes të javës së 15-të ndaj Vllaznisë në ndihmë të familjeve të prekura nga tërmeti i datës 26 nëntor.
Bëjmë thirrje tifozavë bardhekuq dhe komunitetit sportdashës të ndihmojnë dhe kontribojnë sadopak për familjet e prekura nga kjo fatkeqësi natyrore.
Detajet e shitjes së biletave do të publikohen një moment të 2-të!
Të gjithë bashkë #përShqipërinë
(Kosova Sot Online)