“Cavani ka kërkuar të largohet nga PSG-ja”
Drejtori sportiv i Paris Saint-Germainit, Leonardo ka zbuluar se Edinson Cavani e ka kërkuar largimin nga Franca pasi po e kërkon një eksperiencë të re
Edinson Cavani ka kërkuar të largohet nga Paris Saint-Germaini gjatë afatit kalimtar të janarit.
Lajmin e ka bërë të ditur drejtori sportiv i klubit francez, Leonardo, shkruajnë mediat franceze.
Gjithashtu, ish-futbollisti brazilian ka zbuluar se kampioni francez tashmë e ka refuzuar një ofertë të Atletico Madridit.
Përfaqësuesi uruguaian lidhet qe një kohë të gjatë me një largim të mundshëm nga Parisi.
Mirëpo, tash ai e ka bërë kërkesën zyrtare për të ndodhur një gjë e tillë.
Ish-futbollisti i Palermos dhe Napolit po has në probleme me lëndime këtë sezon dhe ka përfunduar si qendërsulmuesi i dytë në ekip pas Mauro Icardit.
Ai po e kalon vitin e fundit të kontratës në “Parkun e Princave”.
Ka mundësi që Cavani t’i japë fund këtë muaj eksperiencës prej gjashtë vjetësh e gjysmë në PSG.
Për sulmuesin e rrezikshëm flitet po ashtu se mund të rikthehet në Itali ose të transferohet në Shtetet e Bashkuara të Amerikës.
(Kosova Sot Online )