Piatek, i mërzitur që u largua nga Milani
Sulmuesi polak do ta vazhdojë karrierën në klubin gjerman, Hertha Berlin, ku synon të luajë në vazhdimësi
Krzysztof Piatek i ka dhënë fund eksperiencës së shkurtër tek Milani.
Sulmuesi polak është larguar nga “Rossoneri” pas vetëm një viti.
Ish-futbollisti i Genoas kishte përfunduar kohëve të fundit në bankinë në “San Siro”.
Prandaj, ai iu bashkua Hertha Berlinit, ku synon të luajë në vazhdimësi.
Përfaqësuesi polak e kishte nisur furishëm eksperiencën tek Kuqezinjtë duke i realizuar 10 gola në 13 ndeshje vitin e kaluar.
Mirëpo, këtë edicion i shënoi vetëm 6 gola në 28 ndeshje dhe përfundoi në bankinë, si rezervist i Zlatan Ibrahimovicit.
Piatek i kushtoi klubit gjerman 28 milionë euro.
24 vjeçari e ka përshëndetur Milanin dhe thotë se për të këta ishin 12 muaj të paharrueshëm në jetë.
“Transferimi në Milan ishte realizimi i ëndrrave të fëmijërisë. Nuk e kam menduar kurrë se do të shënoja gola me këtë fanellë. Ishte një eksperiencë e paharrueshme, nuk do ta harroj kurrë. Po largohem me kokën lartë. Faleminderit tifozë, faleminderit Milan, të uroj suksese”, ka shkruar Piatek në rrjetet sociale.
(Kosova Sot Online)