Ajaxi dhe Chelsea e konfirmojnë marrëveshjen për Ziyech

Ajaxi ka njoftuar se ka arritur marrëveshje për ta shitur anësorin Hakim Ziyech në Chelsea, në fund të këtij sezoni.

Skuadra e Frank Lampard do t’i paguajë 40 milionë euro për përfaqësuesin e Marokut, i lindur në Holandë.

Kjo shumë do të rritet në 44 milionë euro varësisht prej arritjes së bonuseve nga lojtari.

Arritja e marrëveshjes është konfirmuar edhe nga Chelsea.

Por 26-vjeçari ende nuk ka arritur marrëveshje me të kaltrit për kushtet personale, por do të ketë mjaft kohë për ta bërë një gjë të tillë deri në fund të sezonit.

“Ajaxi dhe Chelsea kanë arritur marrëveshje për transferimin e Hakim Ziyech”, thuhet në njoftimin e klubit holandez.

“Lojtari do t’i bashkohet klubit nga Premierliga më 1 korrik 2020 dhe do ta mbarojë sezonin në Amsterdam”, thuhet tutje në njoftim. 

(Kosova Sot Online)