Zbulohet pasaporta e falsifikuar e Ronaldinhos, shkak i së cilës u ndalua ai në Paraguai
Legjenda braziliane Ronaldinho u ndalua nga policia në Paraguai të mërkurën mbrëma, për shkak se dyshohet se kishte përdorur dokumente të rreme për të hyrë në vendin e Amerikës Jugore.
39-vjeçari, i cili e fitoi Kupën e Botës me Brazilin në vitin 2002, u kap në kazinonë “Resort Yacht & Golf Club Paraguayo” bashkë më vëllain e vet, Roberto, të mërkurën në mbrëmje, sipas Ministrisë Brendshme të Paraguait.
Sipas gazetës paraguaiane “La Nacion”, në hotelin ku po qëndronin ata u gjeten pasaporte që mbanin emrat e Ronaldinhos dhe Robertos me shtetësi paraguaiane.
Suposto passaporte paraguaio do Ronaldinho que seria falso. Que história bizarra. pic.twitter.com/qM79XPTTMf
— Carter (@essediafoilouco) March 5, 2020
Të dy vëllezërit u mbajtën në suitën e hotelit, për t’u marrë në pyetje nga policia paraguaiane.
Policia paraguaiane tha në një komunikatë për media se Ronaldinho dhe vëllai i tij ishin ftuar në Paraguai nga pronari i kazinosë, Nelson Belotti.
Ronaldinho është momentalisht pa pasaportë braziliane, për shkak të një gjobe të marrë në vitin 2018.
Ish-ylli i Barcelonës dhe vëllai i tij u dënuan për ndërtim të jashtëligjshëm të një kurthe peshkimi në liqenin Guaiba në vitin 2015 pa licencë të duhur në një zonë të mbrojtur.
Gjykata iu shqiptoi atyre gjobë në vlerë 8.5 milionë dollarë në nëntor të vitit 2018 dhe pasi dështuan ta paguanin atë, Gjykata Supreme e Brazilit vendosi t’ia ndalojë Ronaldinhos largimin nga vendi.
(Kosova Sot Online)
