UEFA u kërkoi Romës dhe Interit të tërhiqen nga Liga e Evropës

Gazeta italiane, Il Messaggero, raporton se Interi dhe Roma e kanë refuzuar sugjerimin e UEFA-s për t’u tërhiqur nga Liga e Evropës, shkaku i përhapjes së madhe të koronavirusit në Itali.

UEFA-s raportohet se u ka kërkuar Romës dhe Interit të tërhiqen për të mos marrë pjesë më në Ligën e Evropës, në mënyrë që ndeshjet e kësaj gare të mundë të vazhdojnë në mënyrë të rregullt.

Il Messaggero më tutje shkruan se presidenti i UEFA-s, Aleksander Ceferin, shpreson që gara në Ligën e Evropës do të vazhdojë sipas planeve fillestare, në mënyrë që Kampionati Evropian 2020 të mos përballet me probleme këtë verë.

Këtë qëllim UEFA kishte shpresuar ta realizojë duke e vazhduar garën pa klubet italiane, pasi që u kërkoi atyre të hiqnin dorë nga Liga e Evropës.

Qeveria spanjolle ka vendosur t’i anulojë udhëtimet mes Spanjës dhe Italisë, duke sjellë probleme edhe për Romën, edhe për Interin, të cilat supozohej të luanin sot kundër Sevillas dhe Getafes në 1/8 të finales.

Ndërkohë, Juventusi është vendosur në karantinë pasi mbrojtësi Daniele Rugani doli pozitiv në testin për virusin Covid-19 dhe ndeshja kthyese kundër Lyonit në Ligën e Kampionëve është në rrezik.

Il Messaggero shkruan se UEFA ka kërkuar që edhe Interi e edhe Roma ta përjashtojnë veten nga Liga e Evropës, mirëpo raporton më tutje se dy klubet italiane e kanë refuzuar këtë kërkesë menjëherë.

Pas refuzimit të ofertës nga klubet italiane, UEFA thuhet se i siguroi ato se nuk do t’i përjashtojë pa dëshirën e tyre nga gara, pasi që vendasi nikoqir duhet ta marrë fajin për dështimin e ndeshjes, pasi që Roma ishte e supozuar të luante në Sevillë. 

(Kosova Sot Online)