Fabregas kritikon francezët për përgjigjen ndaj koronavirusit

Mesfushori i Monacos, Cesc Fabregas, e ka kritikuar qasjen e qytetarëve francezë drejt koronavirusit dhe mendon se duhet të merren masa më të ashpra drejt atyre që s’po i respektojnë udhëzimet, për t’u siguruar që virusi të mos përhapet edhe më shumë.

Masa parandaluese mjaft strikte janë vënë në Francë – përfshirë këtu vendimin që francezët të jenë të detyruar  ta printojnë dhe plotësojnë një formular për ta arsyetuar daljen e tyre nga shtëpia, në tentim për ta kontrolluar pandeminë Covid-19.

Sezoni aktual 2019/20 i Ligue 1 është pezulluar, bashkë me shumë liga të tjera të futbollit përreth Evropës, në mënyrë që të tentohet të kontrollohet përhapja e virusit.

Megjithatë, ylli i Arsenalit, Barcelonës dhe Chelseat, Fabregas, thotë se nga ajo që ai e ka parë deri më tani, njerëzit nuk janë duke i marrë këto masa parandaluese shumë seriozisht.

“Para tri ose katër ditëve, unë u desh të shkoja në supermarket për të blerë ushqim për darkë. Dhe, për ta thënë të vërtetën, nuk më pëlqeu ajo që e pash, në kuptimin që kishte njerëz pa dorëza, pa maska dhe nuk respektoheshin rregullat e distancës”, ka thënë 32-vjeçari.

“Në departamentin e frutave dhe perimeve, njerëzit ishin grumbulluar dhe e preknin ushqimin pa dorëza. Unë e pashë një person duke e kapur një fryt me dorë dhe duke e lënë atë prapë në vend sepse nuk i pëlqeu. Kemi ende shumë punë për të bërë”. 

(Kosova Sot Online)