PSG-ja i do Sandron dhe Pjanicin për Icardin
Paris Saint-Germain shpreson të arrijë marrëveshje shkëmbimi me Juventusin, duke ia ofruar Mauro Icardin për dyshen Alex Sandro – Miralem Pjanic.
Sulmuesi argjentinas u huazua në PSG nga Interi verën e kaluar, por duket se do të rikthehet në Itali gjatë kësaj vere.
Megjithatë, gjasat që ai të kthehet në Inter janë të vogla, pasi ai nuk është në planet e klubit zikaltër dhe PSG-ja e ka opsionin për ta blerë atë për 70 milionë euro.
Sipas mediave italiane, PSG-ja pastaj do ta përdorë Icardin për t’i sjellë në klub dy yjet e Juves, Sandron dhe Pjanicin.
Gazzetta dello Sport raporton se drejtori i PSG-së Leonardo planifikon të takohet me homologun e vet te Juventusi, Fabio Paratici, për të gjetur një marrëveshje rreth kësaj çështjeje.
Klubi parisien e ka kërkuar Pjanicin edhe në të kaluarën.
(Kosova Sot Online)