Konfirmohet rinisja e Bundesligës këtë muaj

  • 06 May 2020 - 16:25
 Konfirmohet rinisja e Bundesligës këtë muaj

Bundesliga e ka marrë dritën e gjelbër për t’iu kthyer fushës së blertë në javët e ardhshme nga kancelaria Angela Merkel – përderisa 15 maji mbetet data më e hershme e mundshme për rinisjen e sezonit.

Të mërkurën në mëngjes u raportua se kthimi i Bundesligës ishte shtyrë nga Angela Merkel për të paktën deri më 22 maj, pasi që klubeve u ishte kërkuar të vendosen në karantinë edhe për dy javë para se të mund t’i nisin ndeshjet.

Megjithatë, tani qeveria gjermane e ka aprovuar planin e Bundesligës për t’u kthyer në fushën e blertë në pjesën e dytë të majit, pas një serie takimesh që u përfunduan sot.

Tani i takon vetë Federatës, ligës dhe klubeve të vendosin për datën e saktë të kthimit në fushën e blertë, por mediat gjermane raportojnë se më së shumti gjasa ka që kjo të ndodhë më 15 maj.

Liga elitare e futbollit në Gjermani, që ishte suspenduar në mes të marsit, tani pritet të bëhet e para nga top pesë ligat e Evropës që rinis, përkundër që ndeshjet do të duhet të luhen prapa dyerve të mbyllura.

Shumica e klubeve të Bundesligës kanë qenë duke mbajtur stërvitje që nga muaji i kaluar, ndërsa ndeshjet kanë qenë të pezulluara që nga muaji mars, kur u pezulluan pothuajse të gjitha aktivitetet sportive në botë.

(Kosova Sot Online)