Superliga zyrtarisht pa kampion, tabela vlen vetëm për rënie dhe ngritje nga liga

Federata e Basketbollit e Kosovës ka vendosur që renditja në tabelën e Superligës dhe garave të tjera seniore të vlejë vetëm për rënien dhe promovimin e klubeve në liga, mirëpo jo për shpalljen e një kampioni.

Në mbledhjen e vet të rregullt të mbajtur më 19 maj 2020, Bordi i Federatës së Basketbollit të Kosovës (FBK) duke i parë zhvillimet e fundit me pandeminë COVID-19, në bazë të kompetencave të veta statutare të përcaktuara në nenin 21, sot unanimisht ka marrë vendimin në vijim lidhur me rezultatet dhe arritshmërinë në të gjitha kategoritë seniore për stinorin 2019/2020

Pas ndërprerjes, pezullimit dhe anulimit të garave të të gjitha kategorive seniore, Bordi Ekzekutiv i FBK-së ka vendosur që në asnjë kategori të mos shpallet kampioni dhe mos akordojë tituj sportivë.

Renditja përfundimtare momentale në garat seniore te meshkujt do të merret për bazë ekskluzivisht vetëm për përcaktimin e ngritjes apo rënies nga niveli i garimit, në bazë të Rregullores së Garave të Federatës së Basketbollit të Kosovës dhe Propozicioneve të Garave për stinorin 2019-2020.

KB Lipjani, i renditur në pozitën e fundit, dhe KB Feronikeli, i renditur në pozitën e parafundit në Superligë, bien në një rang më të ulët garimi, largohen nga Superliga e Kosovës dhe në edicionin 2020-21 të garojnë në Ligën e Parë të Meshkujve.

KB Trepça, e renditur e shtata në Superligë, do të luajë ndeshjet e Play-Out-it për të luftuar për ruajtjen e statusit të ekipit garues në Superligën e Kosovës.

KB Vëllaznimi, i renditur në vendin e parë në Ligën e Parë, promovohet në një rang më të lartë të garave dhe në edicionin 2020-21 do të bëjë gara në Superligën e Kosovës.

KB AS Prishtina, e renditur e dyta në Ligën e Parë, do të zhvillojë ndeshjet e Play-Out-it me KB Trepça në luftë për të siguruar statusin e ekipit të fundit të Superligës për stinorin 2020-21.

KB Borea, e renditur e fundit në Ligën e Parë, largohet nga Liga e Parë dhe në edicionin 2020-2021 do të garojë në Ligën e Dytë.

KB NewBasket, i renditur si i parafundit në Ligën e Parë, do të luajë ndeshjet e Play-Out-it për të luftuar për ruajtjen e statusit të ekipit garues në Ligën e Parë.

KB Megasport, i renditur në vendin e parë në Ligën e Dytë, promovohet në një rang më të lartë të garave dhe në edicionin 2020-21 do të bëjë gara në Ligën e Parë të Kosovës.

KB AS Kastrioti, i renditur si i dyti në Ligën e Dytë, do të zhvillojë ndeshjet e Play-Out-it me KB NewBasket në luftë për të siguruar statusin e ekipit të fundit të Ligës së Parë për stinorin 2020-21.

Të gjitha ndeshjet e Play-Out-it sipas këtij vendimi do të luhen në muajin shtator para fillimit të garave të stinorit 2020-21, në orare e afate të cilat do të bëhen të njohura më pas. 

Ky vendim hyn në fuqi në datën e miratimit të tij nga Bordi Ekzekutiv i Federatës së Basketbollit të Kosovës. 

(Kosova Sot Online)