Tyson Fury kundër Mike Tysonit? – Britaniku konfirmon ofertën

  • 27 May 2020 - 08:45
Tyson Fury kundër Mike Tysonit? – Britaniku konfirmon ofertën

Kthimi i Mike Tysonit ka qenë ndër temat kryesore në botën e boksit gjatë javëve të fundit, ndërsa së fundi kampioni Tyson Fury ka pretenduar se ai e ka pranuar një ofertë të ndeshet në një meç për bamirësi me 53-vjeçarin.

Mike Tyson pritej të ndeshej me ndonjë ish-boksier të moshës së tij, pasi e lajmëroi kthimin e tij në ring për një meç bamirës, përderisa përflitej meçi i shumëpritur kundër Evander Holyfield.

Megjithatë, tani duket se Tyson është i gatshëm të ndeshet me një kampion aktual të boksit, Furyn që mban titullin e WBC.

“Unë e mora një telefonatë ku m’u ofrua mundësia të ndeshem me Mike Tysonin. Unë menjëherë mendova: “Çfarë?!” Natyrisht se pranova menjëherë”, ka thënë Fury.

Megjithatë, kampioni i WBC, i cili e fitoi titullin e tij duke e mposhtur Deontay Wilderin në shkurt, nuk mendon se do të zhvillohet ky meç.

“Por, nuk mendoj se diçka është materializuar nga ajo bisedë. Kështu që po, mendoj që ai e ka seriozisht kur thotë se dëshiron të kthehet për një meç”.

(Kosova Sot Online )