FIFA e trondit Partizanin, ia ndalon transferimin e lojtarëve

  • S.A /
  • 16 July 2020 - 12:12
FIFA e trondit Partizanin, ia ndalon transferimin e lojtarëve

Partizani merr një goditje të rëndë për sezonin e ardhshëm. Të kuqtë të cilët me shumë gjasa nuk do të kualifikohen në Europa League për sezonin tjetër janë tronditur nga vendimi i FIFA-s për t’u bllokuar merkaton në hyrje për 1 vit për shkak të çështjes Çinari.

Sulmuesi, i cili dy vite më parë kishte nënshkruar me Alaves dhe pastaj u huazua te Istra në Kroaci, me kontratën që firmosi te Partizani shkeli rregullat e FIFA-s, ndaj gjyqi ka vendosur kundër Partizanit.

Të kuqtë nuk mund të bëjnë merkato gjatë kësaj vere dhe në janar, ndërkohë që do te duhet të paguajnë edhe 80 mijë euro gjobë. Edhe vetë Çinari e ka pësuar, duke u pezulluar për katër muaj.

Te Partizani nuk janë dakord me dënimin e marrë, ndërkohë që gjasat janë se do ta apelojnë vendimin.

Ky sezon ka shkuar si mos më keq për Partizanin dhe nëse nuk do të bëjnë merkato as sezonin e ardhshëm atëherë edhe tjetri do të jetë shumë i vështirë pasi përveç Trashit edhe disa titullarë të tjerë janë në skadencë kontrate dhe do të largohen dhe të gjithë këta futbollistë do të zëvendësohen nga lojtarë të akademisë dhe të Partizanit B.

(Kosova Sot Online )