Lewandowski, humbësi më i madh pas anulimit të ‘Topit të Artë’

Nuk do të ketë fitues të “Topit të Artë” në vitin 2020 për shkak të gjendjes së shkaktuar në futboll nga pandemia koronavirus, ka njoftuar France Football.

France Football – revista prestigjioze franceze që e ndan këtë çmim – ka thënë se nuk do ta ndajë këtë çmim për këtë vit sepse nuk ka pasur kushte mjaftueshëm të drejta për të vendosur se kush e meriton atë.

Lionel Messi gjashtë herë dhe Cristiano Ronaldo, portugezi i cili e ka fituar atë pesë herë në karrierë, pritej të ishin sërish në garë për këtë çmim këtë vit, por me konkurrencë të fortë nga Robert Lewandowski i Bayern Munich dhe Kevin de Bruyne i Manchetser City.

Madje Lewandwski i Bayern Munich ishte favorit deri më tani sipas disa statistikave.

Ai ka pasur sezon ëndrrash, më të mirin në karrierë dhe është rrugës së mirë për ta fituar Këpucën e Artë pasi ka shënuar më së shumti gola në Evropë, më shumë edhe se Messi dhe Ronaldo.

Leëa ka shënuar 51 herë në 43 paraqitje – shifra vërtetë mbresëlënëse që e shtynin atë të ëndërrojë madje edhe për “Topin e Artë”.

Por kjo ëndërr do të mbetet tani per tani vetëm ëndërr.

Topi i Artë – çmimi më prestigjioz individual për futbollistë – është ndarë që prej vitit 1956.

Fitues i tanishëm i këtij çmimi është Lionel Messi i Barcelonës, që vitin e kaluar e fitoi atë për herë të gjashtë rekorde në karrierë.

Megjithatë, për shkak të kushteve të jashtëzakonshme në të cilët po jetojmë sot, është vendosur se nuk është e drejtë ta zgjidhet futbollisti më i mirë në botë duke i marrë parasysh rrethanat në të cilat futbolli është duke u luajtur këtë vit.

Kjo nënkupton se Messi do ta mbajë këtë çmim për edhe 12 muaj të tjerë.

France Football shkroi në uebsajtin e vet: “Në rrethana të jashtëzakonshme, në kushte të jashtëzakonshme. Për herë të parë në historinë e vet, e cila nisi më 1956, Topi i Artë nuk do të ndahet në vitin 2020, për shkak të mungesës së kushteve mjaftueshëm të drejta”. 

(Kosova Sot Online)