Juventusi mund ta festojë titullin në Serie sonte
E diela mund të jetë dita e kurorëzimit të 9-të radhazi për Juventusin në Serie A. Bardhezinjtë kanë një tjetër mundësi ta fitojnë titullin zyrtarisht në sfidën përballë Sampdorias që do të luhet në orën 21:45 në Allianz Stadium.
Java e 36-të mund të jetë ajo idealja që Maurizio Sarri të fitojë titullin e tij të parë në Serie A në karrierë. Me barazimin e Atalantas ndaj Milanit dhe fitoren e Interit ndaj Genoas, vetëm 3 pikët ndaj Sampit të Ranierit që e ka siguruar tashmë mbijetesën i bëjnë punë Juves që gjithsesi mund ta sigurojë titullin edhe duke grumbulluar vetëm 2 pikë në 3 ndeshjet e fundit.
Sarri ndaj Sampit do të hedhë në fushë formacionin më të mirë të mundshëm duke pasur parasysh mungesat.
Në orën 19:30 do të zbresin në fushë dy skuadrat kryeqytetase. Lazio me një fitore ndaj Veronas në Bentegodi mund të kapë Atalantën në vendin e 3-të në kuotën e 75 pikëve, ndërkohë që Roma me një sukses ndaj Fiorentinës në Olimpico mund të vrasë garën për vendin e 5-të me Milanin që mund të dorëzohet përfundimisht pasi diferenca 2 javë para fundit mund të shkojë në 4 pikë.
(Kosova Sot Online)