Werderin e Leipzigun i ndajnë 10 milionë euro për Rashicën
Klubi aktual i futbollistit kosovar i kërkon 25 milionë euro për kartonin e tij, kurse klubi më i interesuar për 24 vjeçarin i ofron vetëm 15 milionë euro.
Werder Bremeni është i gatshëm ta shesë Milot Rashicën gjatë kësaj vere.
Mirëpo, klubi gjerman nuk e ka ndërmend të bëjë sakrifica për përfaqësuesin kosovar.
Në fakt, klubi nga Bundesliga i kërkon 25 milionë euro për 24 vjeçarin.
Interesimin më serioz për ish-futbollistin e Vushtrrisë dhe të Vitesses e ka shfaqur Leipzigu.
Por, për momentin ky klub nuk është i gatshëm t’i ofrojë më shumë se 15 milionë euro, plus bonuset, varësisht prej arritjes së objektivave të klubit dhe vetë lojtarit.
Drejtori sportiv i Leipzigut, Markus Krosche nuk e ka fshehur faktin se klubi gjerman e kërkon vushtrriasin.
“Miloti është një lojtar mjaft interesant. Por, ka edhe lojtarë të tjerë që na pëlqejnë”, ka thënë ai.
“Ne e duam Milot Rashicën, por nuk e paguajmë atë shumë të kërkuar”, është përgjigja e drejtuesve të Leipzigut për kërkesën e Werderit për lojtarin.
Pra, për momentin dallimi në mes të kërkesës dhe ofertës është 10 milionë euro.
Gjithashtu, interesim për Rashicën kanë shfaqur edhe Borussia Dortmundi e Hertha Berlini në Gjermani, Milani, Napoli e Lazio në Itali dhe Liverpooli, Aston Villa, West Hami e Wolverhamptoni në Angli.
(Kosova Sot Online)