Valon Berisha publikon foto nga stërvitjet e para me klubin e ri
Ylli i Kosovës, Valon Berisha, ka publikuar fotografi nga stërvitjet e para me klubin e tij të ri, Stade de Reims, përderisa e ka përshkruar si të mrekullueshme ndjenjën e nisjes së kësaj aventure të re në Francë.
Pas huazimit për një sezon nga Lazio në Fortuna Dusseldorf, Lazio e shiti Valon Berishën në Stade de Reims për një shumë që raportohet të jetë 4.3 milionë euro.
Tani, pas karrierës në Norvegji, Austri, Itali e Gjermani, Berisha do ta provojë veten edhe në Francë me Stade de Reims, ku luan edhe ylli tjetër i ekipit kombëtar të Kosovës, Arbër Zeneli.
“Dita e parë në Stade de Reaims, dje. Ndjenjë e mrekullueshme t’ia nisim [punës]. #punëepalodhshme #përkushtim #parasezon”, shkroi Berisha mbi fotografitë e publikuara.
Sezoni i Ligue 1 nuk rinisi si ligat e tjera të mëdha në Evropë, por u ndërpre në mars përfundimisht, shkaku i përhapjes së koronavirusit. Klubet franceze tashmë i kanë filluar përgatitjet për sezonin e ri 2020/21.
(Kosova Sot Online)