Drita synon fitore në finalen e rundit preliminar për kualifikimin në Champions

Kampionia e Kosovës, Drita e udhëhequr nga Ardian Nuhiu, do të tentojë të shkojë edhe një hap më afër kualifikimit në Ligën e Kampionëve, duke e fituar finalen e rundit preliminar kualifikues, kundër klubit irlandez Linfield.

Drita e fitoi ndeshjen e parë në kualifikime për Ligën e Kampionëve dhe do të tentojë të vazhdojë me po këtë hap të martën në orën 18:00, kundër klubit irlandez Linfield, në finalen e rundit preliminar në kualifikimet për Champions.

Kampionia e Kosovës, Drita, e nisi rrugëtimin në kualifikimet për Ligën e Kampionëve me fitore, pasi që arriti ta mposhtë me rezultat 2:1 klubin nga Andorra, Inter Club d’Escaldes, falë golave të shënuara nga Xhevdet Shabani dhe Hamdi Namani.

Tani, Dritën e pret finalja e këtij rundi preliminar të Ligës së Kampionëve, ku do të përballet me klubin irlandez, Linfield, që shënoi sot fitore në gjysmëfinalen tjetër – 2:0 kundër Tre Fiori, që luajti me dhjetë lojtarë në fushë.

Linfield nuk krijoi raste të shumta në këtë ndeshje, siç krijoi Drita në ndeshjen e vet, mirëpo dy golat nga zëvendësuesit Bastien Hery dhe Christy Manzigna i mjaftuan për ta zënë vendin në finale kundër Dritës.

Nëse e fiton edhe ndeshjen kundër Linfield, atëherë Drita do të vazhdojë tutje me fillimisht rundin e parë kualifikues, pastaj rundin e dytë kualifikues e në fund i ka play-offs për kualifikim, të cilat ia sigurojnë vendin në grupet e Ligës së Kampionëve.

(Kosova Sot Online )