Nishevci e Orana me paraqitje të mirë në Karate 1 Premierligë, shënojnë nga dy fitore

Herolind Nishevci dhe Fortesa Orana kanë shënuar nga dy fitore në Karate 1 Premier Ligën, që po mbahet në Lisbonë të Portugalisë.

Të dy karateistët tanë hynë në 16 garuesit më të mirë në kategori, që vlerësohet sukses, bazuar në cilësinë e garës dhe numrin e madh të garuesve dhe shteteve.

Nishevci, në kategorinë +84 kg, fitoi ndaj Daniel Daniel të Indonezisë dhe Issam Najdi të Holandës, ndërsa u mund nga kroati, Angjelo Kvesiq.

Orana në kategorinë +68 kg, mposhti Lora Ziller të Austrisë dhe Dominika Tatarova të Sllovakisë, ndërsa pësoi humbje nga Sofya Berultseva të Kazakistanit.

Si Nishevci, ashtu edhe Orana, fituan pikë olimpike Tokio 2020. Garuesit tanë të tjerë nuk ishin me fat, duke u ndalur në raundin e parë.

Premier Liga e Lisbonës ishte e mirëseardhur për karateistët kosovarë, të cilët në muajin e ardhshëm do të marrin pjesë në turneun kualifikues për Lojërat Olimpike Tokio 2020, në të cilin shpresojnë ta realizojnë ëndrrën për të fituar ‘biletën’ për Tokio 2020.Komiteti Olimpik i Kosovës iu uron më shumë fat karateistëve tanë në garat e ardhshme ndërkombëtare.

(Kosova Sot Online)