Lexoni edhe:
Cila grua është në rrezik?
Si ta kuptosh që rënia e flokëve në vjeshtë (nuk) është simptomë e koronavirusit
Dermatologët në SHBA, në një studim të fundit, vunë re një rritje të rasteve të individëve që raportuan se pasi kishin dalë pozitiv me Covid-19, vinin re grumbuj flokësh në jastëk ose në dush.
Por ekspertët shprehen se kjo ndodh për shkak të niveleve më të larta të stresit, si pasojë e infektimit nga virusi dhe nuk është aspak një simptomë e vetë virusit.
Njerëzit gjithashtu mund të humbasin flokët e tyre gjatë kësaj periudhe për shkak të sezonit, ku pjesa më e madhe e individëve kanë tendencën që të pësojnë një rënie të flokëve.
Rënia e flokëve në vjeshtë është mit?
Megjithëse rënia sezonale e flokëve është ende temë debati, konsensusi i përgjithshëm është se ndryshimet e motit mund të rritin rënien e flokëve dhe ky fenomen është më i zakonshëm te gratë. Arsyeja mendohet se është shkak i ndryshimeve hormonale ose edhe i stresit. Megjithatë, shumë mjekë ua atribuojnë rënien e flokëve në këtë sezon edhe faktorëve të mjedisit si kripës së detit, klorit të pishinave dhe rrezeve të diellit gjatë verës që përshpejtojnë konsumimin e fijeve.
Nga ana tjetër, studimet kanë treguar se gjatë verës, flokët rriten më shumë për të mbrojtur skalpin nga rrezet e diellit. Moti më i ngrohtë rrit furnizimin me lëndë ushqyese të nevojshme për të prodhuar keratinën, gjë që rezulton në rritje më të shpejtë flokësh dhe më të gjatë. Por pas verës, shumë njerëz ankohen për rënie të tepërt, veçanërisht midis shtatorit dhe nëntorit.
Shkencëtarët thonë se fakti që humbja sezonale e flokëve është më e zakonshme tek gratë shpjegohet nga dy arsye kryesore: ndërgjegjësimi dhe ndryshimet hormonale dhe psikologjike. Gratë kanë tendencë të jenë më të vetëdijshme për gjendjen e flokëve të tyre dhe të kalojnë më shumë kohë me to çdo ditë. Gratë, gjithashtu, kalojnë më shumë ndryshime hormonale çdo muaj, që ndikojnë në gjendjen e tyre psikologjike, prandaj dermatologët supozojnë se ky efekt rrit gjithashtu rënien e flokëve.
Pse bien flokët në vjeshtë?
Rënia e flokëve në këtë stinë është e ngjashme me rënien e gjetheve të vdekura të pemëve. Pra, edhe flokët bien, sepse përsërisin ciklin e tyre të përvitshëm (lindja e një floku të ri, rritja, faza e maturimit dhe vdekja). Këtë proces e përshpejton një faktor kryesor: dielli. Kështu, gjatë pranverës dhe verës, rrezet e diellit rrisin sekretimin e hormoneve përgjegjëse për rritjen e flokut dhe shkaktojnë një reaksion të ngjashëm me atë të bimëve. Një periudhë prej gati 4-6 javësh mund të fillojë në fund të gushtit dhe të zgjasë deri në fund të nëntorit. Pas kësaj periudhe, gjithçka kthehet në normalitet.
Por norma e rënies së flokëve ndryshon nga një person tek një tjetër, ndaj është e rëndësishme të kuptosh, nëse kjo rënie është sezonale apo duhet të shqetësohesh e të konsultohesh me mjekun për të marrë trajtimin e duhur.
Si ta kuptosh që është thjesht një rënie sezonale?
Për të kuptuar nëse është vetëm një rënie sezonale, bëj këtë test të thjeshtë:
Mbaji flokët të palarë, të paktën për tri ditë. Kalo gishtat midis flokëve nga rrënja deri në majë. Vëri mënjanë flokët e rënë. Përsërite këtë veprim të paktën pesë herë, duke e kaluar dorën tek të gjitha pjesët.
Rezultati:
- Nëse në total të kanë rënë më pak se 10 fije floku, gjithçka është brenda normales.
- Nëse të kanë rënë gjithsej 10-15 fije, nuk është thjesht një rënie sezonale, prandaj duhet të marrësh një trajtim shtesë me vitamina.
- Nëse të kanë rënë më shumë se 15 fije, duhet të bësh patjetër një trajtim specifik për të parë nga se të shkaktohet kjo rënie.
Trajtimi për rënien sezonale
Para se të marrësh një trajtim, fillimisht duhet të bësh këtë test të thjeshtë (ose të konsultohesh me mjekun), për të kuptuar në ç’nivel të rënies së flokëve je. Ki parasysh që trajtimet e flokëve nuk veprojnë në mënyrë specifike tek flokët që bien, sepse ato tashmë janë të vdekur dhe rënia e tyre është e pashmangshme, por ato ndikojnë në rritjen e flokëve të rinj për t’i rikthyer densitetin normal.
Megjithatë, ki parasysh që jo gjithçka duhet justifikuar me sezonin e vjeshtës. Për flokët duhet të kujdesesh si për çdo pjesë tjetër të trupi. Lyerja me bojëra me kimikate të ndryshme, tharja dhe krehja në temperaturë maksimale, kequshqyerja etj., janë faktorë të jashtëm, të cilët ndikojnë në dëmtimin dhe rënien e flokëve. Në të tilla raste, përdor sa më shumë maska me produkte natyrore, si p.sh maska me vezë dhe vaj ulliri, 30 minuta para larjes, do të të ndihmojë shumë për eliminimin e rënies.
(Kosova Sot Online)
