Hoti takon Konjfucën, harmonizojnë tekstin e mocionit për rrëzimin e Qeverisë

 

Pas takimit të krerëve të partisë, një takim tjetër për t’u dakorduar rreth rrëzimit të Qeverisë Haradinaj, e kanë organizuar edhe shefet e grupeve parlamentare të Lëvizjes Vetëvendosje dhe LDK’së, Glauk Konjfuca e Avdullah Hoti.

Në këtë takim ata janë dakorduar për tekstin e mocionit, përmes të cilit do të synojnë rrëzimin e koalicionit PDK-AAK-NISMA nga pushteti.

Përveç Konjufcës, Hoti ka takuar edhe deputetin Ilir Deda, ndërkohë u ka bërë thirrje të gjithë grupeve tjera parlamentare që të përkrahin këtë nismë të opozitës për rrëzimin e Qeverisë.

“Kryetari i Grupit Parlamentar të LDK-së, Avdullah Hoti, së bashku me Kryetarin e Grupit Parlamentar të VV-së, Glauk Konjufca, sot kanë harmonizuar tekstin e mocionit të mosbesimit ndaj Qeverisë së Republikës së Kosovës. Hoti sot është takuar edhe me përfaqësuesin e Grupit Parlamentar të PSD-së dhe deputetin Ilir Deda, si dhe ka komunikuar me deputeten Mimoza Kusari Lila, për të diskutuar për mocionin e mosbesimit ndaj Qeverisë së PAN-it”, thuhet në komunikatën e lëshuar nga zyra për media e LDK’së.

Hoti u ka bërë thirrje të gjithë partive që t’i bashkohen nismës për rrëzimin e Qeverisë.

“Në cilësinë e Kryetarit të Grupit më të madh Parlamentar në Kuvendin e Kosovës, Hoti fton të gjitha grupet parlamentare dhe deputetët e pavarur të mbështesin mocionin”, përfundon njoftimi.

Kreu i LDK’së, Isa Mustafa, dje gjatë ditës është takuar edhe me kreun e PSD’së, Shpend Ahmetin, me të cilin kanë diskutuar rreth mocionit për rrëzimin e Qeverisë Haradinaj.

(Kosova Sot Online)