PDK distancohet nga një faqe me emër të saj

Partia Demokratike e Kosovës është distancuar nga një faqe që thirret në emër të tyre dhe e cila ka shpërndarë një video në të cilën flitet për një person të quajtur “ Krenar Jahiu”, e për të cilin në video pretendohet se është “kushëriri i burrit të Vjosa Osmanit”, shkruan media.

Ka qenë kryetari i Rinisë Demokratike të Kosovës, Donjet Bislimi, i cili ka reaguar duke u distancuar nga faqja në facebook që thirret në emrin e partisë që udhëhiqet nga Kadri Veseli, me po të njëjtin emër “Rinia Demokratike e Kosovës”.

“Rinia Demokratike e Kosovës, në rrjetin social disponon, adresën e saj e të vetme në nivelin qendror, me emër: Rinia Demokratike e Kosovës, me logo të Partisë Demokratike, me adresë: https://www.facebook.com/Rdkqender/”  ka thënë kreu i rinisë së PDK’së.

Sipas Bislmit është e vështirë të kontrollohen të gjitha faqet që hapen në emër të Rinisë Demokratike të Kosovës, pasi sipas tij është shumë e lehtë që të krijohen të tilla në prag të fushatave.

“Rinia Demokratike e Kosovës, nuk mund të kontrolloj faqet që shfaqen nga personat tjerë në emër të Rinisë Demokratike të Kosovës, as t’i ndaloj ato, për shkak të lehtësisë së krijimit të tyre, mbylljes dhe rishfaqjes në prag të fushatave”, ka shtuar tutje ai.

Në fund thotë se denoncon çfarëdo keqpërdorimi të rrjeteve sociale.

“Rinia Demokratike e Kosovës, ka denoncuar dhe denoncon çdo keqpërdorim të rrjeteve sociale, duke mbetur besnike e vlerave të proklamuara nga Partia Demokratike e Kosovës, për të luftuar çdo dukuri negative në vendin tonë, me besim, zhvillim, integrim!” përfundon reagimi.

Media  ka qenë mediumi i parë që ka raportuar lidhur me videon e shpërndarë nga një faqe të quajtur “Rinia Demokratike e Kosovës” e që mban edhe logon e PDK’së në fotografinë e profilit.

Ka pasur gjithashtu edhe një konfirmim për media nga familja e Vjosa Osmanit se nuk kanë asnjë lidhje me personin e përfolur në video.

(Kosova Sot Online)