Vlora Çitaku: Thaçi më ka kërkuar ta vazhdoj detyrën

  • 04 mars 2020 - 11:38
Vlora Çitaku: Thaçi më ka kërkuar ta vazhdoj detyrën

Vlora Çitaku e pranon kërkesën e Ministrit Glauk Konjufca për t’u larguar nga pozita, por ajo thotë se ka pasur kërkesë nga Presidenti Thaçi për ta vazhduar punën e saj si Ambasadore në SHBA.

Ambasadorja e Kosovës në Uashington, Vlora Çitaku, e ka pranuar propozimin e kryediplomatit Glauk Konjufca për t’u larguar nga detyra.

Dekretin e shkarkimit të një ambasadori duhet ta nënshkruaj Presidenti, megjithatë në reagimin e saj në Facebook, Çitaku shkroi se do ta respektojë kërkesën e Konjufcës dhe se nuk do të tentojë të qëndrojë në një pozitë ku është e padëshiruar nga Qeveria.

Por në shpjegimin që ambasadorja e ka dhënë në gjuhën angleze në Twitter, ajo ka shtuar edhe një fjali tjetër.

Çitaku tregon se Presidenti Hashim Thaçi i ka kërkuar asaj që të vazhdojë detyrën e saj në krye të misionit diplomatik të Kosovës në SHBA.

“Edhe pse Presidenti ka autoritet ekskluziv për këtë vendim dhe ai më ka kërkuar mua të vazhdojë shërbimin me kapacitetet e mia të tanishme, unë do ta respektojë kërkesën e Qeverisë”, ka shkruar Çitaku.

Konjufca dje vazhdoi valën e dytë të shkarkimeve nga misionet diplomatike.

Ai propozoi shkarkimin ambasadorëve Vlora Çitaku, Edon Cana, Lirim Grejçevci, Shpend Kallaba, Mimoza Ahmetaj, Ylber Hysa, Ramadan Avdiu.

“Një ndër hapat e radhës është edhe kërkesa për kthimin e ambasadorëve politik që e kanë përfunduar mandatin 4 vjeçar të paraparë sipas ligjeve në fuqi të Republikës se Kosovës”, ka shkruar Konjufca.

Çitaku është emëruar në vitin 2015, ndërsa ajo e përfaqëson Kosovën edhe në mbledhjet e Këshillit të Sigurimit të Kombeve të Bashkuara. Paraqitjet e Çitakut në OKB dhe përballjet e saj me kryediplomatin serb Ivica Daciq, janë përkrahur vazhdimisht në Kosovë.

Pas vendimit të Konjufcës dje, ka pasur reagime rreth largimit të Citakut nga detyra.

(Kosova Sot Online)