Franca ndan 4 miliardë euro për maska dhe respiratorë

Presidenti i Francës, Emmanuel Macron, ka thënë se vendi i tij do t’i investojë katër miliardë euro në produkte shëndetësore strategjike, përfshirë maskat dhe respiratorët me qëllim që të plotësohen nevojat e brendshme deri në fund të këtij viti.

“Prioriteti ynë sot është ta fillojmë prodhimin në Francë tash e tutje”, tha presidenti Macron gjatë një vizite në një fabrikë për prodhimin e maskave në rajonin Maine-et-Loire, shkruan “The Guardian”.

“Ne duhet të prodhojmë në Francë, në territorin tonë nga tani e tutje. Disa produkte dhe materiale të caktuara kanë rëndësi strategjike dhe ne kemi nevojë që Evropa të jetë e pavarur në prodhim për ta zvogëluar varësinë”, shtoi ai.

Presidenti francez dhe qeveria e tij janë kritikuar për mungesë të kontributit në luftimin e krizës dhe njoftimi për prodhimin e maskave e nxiti reagimin e partive opozitare.

“Ah, ai ka filluar të kuptojë. T’i rivendosim linjat e prodhimit! Pak më shumë përpjekje!”, shkroi në Twitter Jean-Luc Melenchon nga partia e së majtës ekstreme, “La France Insoumise”.

Prodhimi i maskave do të shtohet nga 3.3 milionë në 15 milionë, por zyrtarët francezë kanë pranuar se nevojiten edhe më shumë maska në situatën nëpër të cilën po kalon vendi.

(Kosova Sot Online)