Policia e Gjakovës arreston dy persona për marrje të ryshfetit dhe keqpërdorim të autoritetit zyrtar

Policia e Kosovës përmes një shkrese adresuar mediave ka bërë të ditur se Njësia për Hetimin e Krimeve Ekonomike dhe Korrupsionit në Gjakovë, ka arrestuar dy persona nën dyshimin se kanë kryer veprat penale të “Keqpërdorimit të pozitës apo autoritetit zyrtar” dhe “Marrjes së ryshfetit”.

“Policia e Kosovës, konkretisht Njësia për Hetimin e Krimeve Ekonomike dhe Korrupsionit në Gjakovë, ka bërë arrestimin e dy personave të dyshuar për veprat penale ”Keqpërdorimi i pozitës apo autoritetit zyrtar” nga neni 260 dhe ,,Marrja e ryshfetit” nga neni 421 KPRK-s”, njofton Policia e Kosovës.

Tutje, policia tregojnë rastin se si erdhi deri te arrestimi i të dyshuarve.

“Pas pranimit të informacioneve nga ankuesi i rastit lidhur me një person të dyshuar i cili i kishte kërkuar ryshfet të njëjtit, përmes një personi të dytë, në këmbim të mos-shqiptimit të gjobës apo kontrollimit të biznesit të tij, Policia e Kosovës ka aplikuar masat e fshehta të hetimit, saktësisht “blerje të simuluar”, me ç’rast është arrestuar në flagrancë njëri nga të dyshuarit (kontabilist) i cili nga ankuesi kishte pranuar një shumë parash prej 500 (pesëqind) euro, para të cilat janë pranuar për të dyshuarin tjetër (inspektor i ATK-së).

Gjatë zbatimit të kësaj urdhërese është arrestuar edhe i dyshuari tjetër (inspektor i ATK-së).

Lidhur me rastin, personat e dyshuar të arrestuar janë:

D. F. i lindur me 1977 m/kosovar dhe

B. H. i lindur me 1990 m/kosovar.

Pas intervistimit të të dyshuarve, në konsultim me prokurorin kompetent, me vendim të tij i dyshuari D.F. (inspektor i ATK-së) është ndaluar në mbajtje, ndërsa i dyshuari B.H. është liruar në procedurë të rregullt”, thuhet në njoftim.

(Kosova Sot Online)