Italia nga java e ardhshme shtrëngon masat pas rritjes së rasteve të reja
Italia ka marrë vendim të mbyll kinematë, pishinat dhe palestrat nga e hëna, në një përpjekje të radhës për të frenuar rritjen e shpejtë të infeksioneve të koronavirusit.
Baret dhe restorantet do të duhet të mbyllen deri në orën 18:00, por dyqanet dhe shumica e bizneseve do të vazhdojnë të funksionojnë.
Ndërkohë, kabineti qeveritar i Spanjës të dielën ra dakord për një “gjendje alarmi” në të gjithë vendin.
Të dyja vendet u goditën rëndë gjatë valës së parë të pandemisë në Evropë.
Shtrëngimi i masave u miratua midis kryeministrit Giuseppe Conte dhe udhëheqësve rajonalë.
Rajoni i Campania, ku përfshihet Napoli, ka qenë ndër ata që kërkojnë kufizime më të rrepta.
Sipas masave të reja, pjesa më e madhe e mësimit në shkollat e mesme do të zhvillohet online.
Shtrëngimi i masave vjen në kohën e protestave në Napoli, dhe më pas në Romë, kundër ashpërsimit të tyre.
E shtuna shënoi një rekord të ri rastesh në Itali me më shumë se 19,600 të infektuar. Numri i vdekjeve në 24 orë ka shkuar në 151.
(Kosova Sot Online)