Ambasada ruse: Presidenti i Afganistanit iku me makinat plot me para

Ambasadori afgan në Taxhikistan Mohammad Zahir Aghbar e ka akuzuar presidentin afgan Ashraf Ghani se u largua nga vendi me çantat plot me para. Sipas tij, Ghani përvetësoi plot 169 milionë dollarë.

Pretendime të ngjashme vijnë nga Ambasada e Rusisë në Kabul. Sipas kësaj ambasade, Ghani iku nga vendi me katër makina dhe një helikopter plot me para.

Raportohet se zëdhënësi i Ambasadës, Nikita Ishchenko tha se ‘kolapsi i regjimit më së shumti u karakterizua nga mënyra e largimit të Ghani nga Afganistani. Katër makina u mbushën me para derisa ata tentuan të fusnin pjesë tjera të parave në helikopter por s’i morën dot të gjitha. Disa paratë u lanë në rrugë”.

Sidoqoftë, Ishcenko nuk publikoi ndonjë dëshmi që do të faktonte akuzat kundër Ghani.

Ndërkohë, presidenti afgan Ashraf Ghani ka konfirmuar të mërkurën se ndodhet në Emiratet e Bashkuara Arabe, por shtoi se është në konsultime për t’u rikthyer në Afganistan.

(Kosova Sot Online)