Katër skenarë të profesorit amerikan Poast për “synimin final të Putinit”
Profesori amerikan, Paul Poast, i cili ligjëron në Departamentin e Shkencave Politike në Universitetin e Chicagos ka dhënë katër skenarë të asaj se çfarë Putin synon të bëj përmes luftës në Ukrainë.
Profesori amerikan thotë se asnjë nga skenarët nuk është i mirë. Poast shkruan se skenari i parë është: Imponimi i Jashtëm për ndryshim të pushtetit.
Sipas tij, Putin tenton të instalojë një pushtet pro-rus në Ukrainë.
“Putini kërkon që të etablojë një regjim pro-rus në Kiev. Ukraina mbetet e pavarur, por “mbështetet”, pafundësisht, nga forcat ruse”, ka shkruar Poast.
Skenari i dytë sipas profesorit amerikan është “Mbytja e Shtetit”.
“Putin synon të aneksojë të gjithë Ukrainën brenda Rusisë”, ka vazhduar tutje në shkrimin e tij në tëitter.
Skenarin e tretë e ka titulluar “Tejkalimi Perandorak”.
Poast thotë se etno-nacionalizimi i Putinit i kombinuar me paranojën e sigurisë e shtynë presidentin rus të kërkojë rikrijimin e të gjithë “perandorisë ruse/BRSS-së”.
Në skenarin e katërt të cilin e ka emëruar si “Lufta e fuqive të mëdha”, Poast thotë se Putini dëshiron që ta zhvendos fokusin e tij tek shtetet baltike.
“Edhe pse ato janë anëtare të NATO-së, në mendjen e tij, ndjen një mundësi për të goditur dhe të korrektojë gabimin e të lejuarit për t’u ‘bashkuar me Perëndimin”,
Por cili është skenari më i mundshëm. Poast thotë se kjo varet nga dy faktorë. I pari ka të bëj me atë se cilat janë synimet e Putinit, pra nëse janë maksimaliste apo të limituara dhe faktori i dytë lidhet me atë se sa e lehtë do të jetë pushtimi i Ukrainës.
Poast thotë se nëse Putini ka synime maksimaliste për ta rindërtuar “Perandorinë Ruse” dhe nëse pushtimi i Ukrainës shkon shpejtë nga vështrimi operacional ushtarak atëherë, Putini mund të trimërohet për të marrë më shumë rreziqe.
“Konkretisht, nëse Putini ka synime “maksimaliste” me të cilat ai kërkon të rindërtojë Perandorinë Ruse (gjë që sugjerojnë fjalimet e tij të ditëve të fundit) dhe pushtimi i Ukrainës është relativisht i shpejtë nga një këndvështrim operacional ushtarak, atëherë kjo mund të ushqejë besim të tepruar. Një besim i tillë i tepërt mund t’i shtyjë liderët të pranojnë më shumë rreziqe” , ka shkruar Poast.
Profesori amerikan thekson se në kushte të tilla ka të ngjarë që shkohet me skenarin e tretë dhe shton se edhe i katërti është i mundur.
Poast teksa flet për skenarin e katërt, rikthen ngjarjet e Luftës së Dytë Botërore. Siç shkruan në llogarinë e tij zyrtare në “twitter”, profesori amerikan thotë se ajo luftë nuk ndodhi për shkak të pushtimit gjerman-sovjetik të Polonisë, por kur një sukses i tillë e bëri Hitlerin tepër ambicioz dhe më pas pushtoi Francën.
(Kosova Sot Online)
