Lista finale e atyre që nuk e kanë deklaruar pasurinë sipas ligjit

Agjencia Kundër Korrupsionit ka njoftuar se 14 zyrtarë publik nuk e kanë deklaruar pasurinë, ndërsa 50 zyrtarë të tjerë e kanë deklaruar pasurinë pas afatit të rregullt ligjor.

Nga numri i  përgjithshëm prej 4748 të zyrtarëve të lartë publik që kanë pasur për obligim ta deklarojnë pasurinë, 4684 zyrtarë të lartë publikë  kanë bërë deklarimin e pasurisë brenda afatit të rregullt ligjor,  50  zyrtarë e kanë deklaruar pasurinë  pas afatit të rregullt ligjor, ndërsa 14  prej tyre nuk e kanë deklaruar pasurinë deri më tani.

Të gjithë zyrtarët e lartë publikë që nuk e kanë deklaruar pasurinë  brena afatit të  paraparë ligjor dhe të cilët nuk kanë arsyetime të bazuara për mos-deklarim, AKK  do të veproj  sipas ligjit, respektivisht kodit penal ku mos-deklarimi paraqet vepër penale dhe e detyron AKK-në të veprojë në pajtim me nenin 430 të Kodit Penal të Kosovës.

Kujtojmë që në vitin e kaluar (2021) nga numri i  përgjithshëm, prej 4721 zyrtarëve, 96  zyrtarë  të lartë publik nuk e kanë deklaruar pasurinë brenda afatit të rregullt ligjor.

(Kosova Sot Online)