A janë politikanët kosovarë pjesë e 'No Fly List'

Debat i madh po bëhet se është apo jo Albin Kurti pjesë e listës ‘No Fly List’ të SHBA-ve. Ani pse Kurti qysh dje ka udhëtuar drejt ‘tokës së premtuar’ për të qenë pjesë e ceremonisë së nënshkrimit të marrëveshjeve me MCC-në.

Krejt kjo ‘hallakamë’ u bë në saje të një deklarate ditë më parë të ish-aktivistit të Vetëvendosjes, Florin Krasniqit.

Sipas Krasniqit, ish financues i VV-së, kryeministri Kurti është në listën e mosudhëtimeve (no-fly list) të Amerikës.

Syri.net Kosova ka adresuar pyetjet në Ambasadën Amerikane në Prishtinë, nëse Kurti ka qenë pjesë e kësaj liste dhe cilët politikanë janë aktualisht, por deri në publikimin e këtij shkrimi, nuk kemi marrë përgjigje.

Por, është Richard Grenell, ish-i dërguari i posaçëm i Administratës Trump për Dialogun mes Kosovës e Serbisë, që ka folur pikërisht për këtë temë.

Ai e ka mohuar se Kurti është në ndonjë listë të ndalimit të fluturimeve.

Madje, deklaroi se meqenëse Kurti udhëton për në Amerikë, nënkupton që nuk është në listën “no-fly list”.

“Albin Kurti nuk është në kurrfarë liste të ndalimit të fluturimit për Amerikë. Nëse je në atë listë, atëherë nuk ka mundësi të fluturosh fare. Fakti që ai po udhëton, po fluturon, tregon që ai nuk është në këtë listë”, tha Grenell.

Por çka është kjo listë dhe kush mund të përfshihet në të?

‘No Fly List’ është një nëngrup i vogël i Bazës së të Dhënave të Ekzaminimit të Terrorizmit të qeverisë së SHBA (e njohur edhe si lista vëzhguese e terroristëve) që përmban informacionin e identitetit të terroristëve të njohur ose të dyshuar. Kjo bazë të dhënash mirëmbahet nga Qendra e Kontrollit të Terrorizmit të FBI-së.

TSA është ndër agjencitë qeveritare të SHBA që kontrollojnë individët duke përdorur informacione nga Baza e të Dhënave të Ekzaminimit të Terrorizmit.

TSA zbaton Listën No Fly përmes programit të saj të Fluturimit të Sigurt.

Individët në Listën No Fly nuk lejohen të hipin në një avion kur fluturojnë brenda, për, nga dhe mbi Shtetet e Bashkuara.

A ka pasur në të kaluarën politikanë kosovarë që kanë qenë pjesë e ‘No Fly List’?

Edhe pse në Ballkan, për politikanë më shumë është aplikuar masa non-grata, sërish disa prej tyre kanë pasur fatin të jenë pjesë e kësaj liste.

Madje, njëri nga ish-kryeministrat kosovarë, sa ishte në drejtimin e ekzekutivit ishte pjesë e ‘No Fly List’, kështu të paktën merr vesh media  përmes burimeve ndërkombëtare.

Kjo listë më shumë ka emra të personave që kanë pasur probleme me ligjin amerikan apo edhe atë ndërkombëtar, se sa politikanë.

(Kosova Sot Online)