Befason ish-ministri i jashtëm i Rumanisë: Ne nuk e njohim Kosovën si shtet

Kombëtarja e Kosovës ka nisur t’i hasë problemet e para politike, pas shortit të hedhur për kualifikimet e Kampionatit Evropian.

Rumania është njëri nga shtetet evropiane që nuk e njeh pavarësinë e Kosovës.

Prandaj, kjo çështje është ngritur në shtetin rumun nga politikani Teodor Melescanu

Ish-ministri i Jashtëm i Rumanisë thotë se zgjidhja më ideale për rumunët do të ishte të mos paraqitet fare në ndeshjet me “Dardanët”, përkundër faktit se mund t’i humbë ato me rezultat zyrtar, 0:3.

“Kosova nuk është e pranuar nga një numër i shteteve, përfshirë edhe ne, Rumaninë. Ne nuk e kemi njohur kurrë pavarësinë e Kosovës. Normalisht, ajo që mund ta bëjmë ne për momentin është që Federata e jonë e Futbollit, përmes Razvan Burleanu, të diskutojë me shtetet tjera që gjenden në pozicion të njëjtë me Rumaninë dhe së bashku ta gjejnë rrugën, e cila nuk do ta shkatërronte sistemin tonë, që të mos i shkelim dhe t’i shpërfillim gjërat që janë mjaft të qarta në pikëpamjen e Rumanisë. Për këtë, do të thosha që Federata Rumune ta gjejë një zgjidhje. Nëse jo, ajo që mund ta bëjë është… që të humbë 0:3 nga Kosova. Le të mos paraqitemi në lojë ndaj Kosovës”, deklaroi Melescanu për “Antena 3”.

Federata Rumune dhe Kombëtarja e këtij vendi mund të dënohet rëndë nëse nuk pranon të luajë me Kosovën dhe nëse nuk e trajton atë njëjtë si Kombëtaret tjera. 

(Kosova Sot Online)